Tuesday, December 4, 2007

وجع دامي

"

ما مرتاح ،، ما مرتاح


ما مرتاح عيوني تستحي بس الدموع وكاح

ما مرتاح منك ،، مني ،، من الجاي،، من الراح

ما مرتاح

عركه وي الزمن ،، ورجعنا مكسورين ،، وبعيده المسافه

وينسي اللي طاح


ما مرتاح

لان شفت الشمس نزلت تبوس القاع ،، وبكف الطفل تنلاح

ولان قاضي البلابل مدد التوقيف ،، ومفتوحه السما

والفيل عنده جناح ،، ما مرتاح

لان قفل المحبه انباك ،، وترهم عليه مفتاح ،، ما مرتاح


ما مرتاح ،، متروك بجزيره ،، وتيهت بالليل واجوو ربعي علي بقافلة اشباح

وانته اشبيك ،، لمن دافعت عن نفسي ،، صابك غيض

مو حتى القنافذ من تحس بالخوف ،، تستخدم جلدها اسلاح

ولاجن الفجر مثل الفجر محبوب ،، لون الفجر صاير يقبض الارواح


ما مرتاح من ربعي ولا مرتاح

تمساح بنهرهم صاحوا من الخوف ،، وجازفت بحياتي

من سمعت اصياح ،، صارعت المنيه

وبيده هزني الموت ،، ومدمي اطلعت

صفقوا للتمساح


،، كل هذا وتريد أرتاح ،، ما مرتاح

،، ما مرتاح من ربعي ولامرتاح ،،


نادوني وركضت بليل

ايد الرسن بيها

وايد بيها سلاح ،، عثرت بمهرتي

وربعي قبل ماطيح ،، واحد قال للثاني

[ أبشرك طاح ]،، [ أبشرك طاح]



*****************************


للشاعر كاظم اسماعيل القاطع

No comments: